ភ្នំពេញ៖ នាយកដ្ឋាននគរបាលបង្ការពន្លត់អគ្គិភ័យ និងសង្រ្គោះ នៃអគ្គស្នងការដ្ឋាននគរបាលជាតិក្រសួងមហាផ្ទៃ បានណែនាំពលរដ្ឋកុំនាំគ្នាទៅដងយកប្រេងពីរថយន្តដឹកប្រេងដែលក្រឡាប់ហូរប្រេងធ្លាយចេញក្រៅ ពីព្រោះវាអាចបង្កជាផ្កាភ្លើងឆាបឆេះបណ្តាលឱ្យគ្រោះថ្នាក់ដល់ជីវិតជាយថាហេតុណាមួយ។
ការអំពាវនាវនេះធ្វើឡើងក្រោយពីមានរថយន្តដឹកប្រេងមួយគ្រឿងបានក្រឡាប់ស្ថិតនៅចំណុចភ្នំប្រុសភ្នំស្រី ខេត្តកំពង់ចាម នៅរសៀលថ្ងៃទី៣១ ខែសីហា ឆ្នាំ២០២៣ ក្រោយមកមានពលរដ្ឋមួយចំនួនបាននាំគ្នាយកធុង ដប និងថង់ ដងយកប្រេង។
នាយកដ្ឋាននគរបាលបង្ការពន្លត់អគ្គិភ័យ និងសង្រ្គោះ បានព្រមានពីគ្រោះថ្នាក់នេះ ដោយសារតែធ្លាប់មានករណីឆាបឆេះពីការទៅច្រកសាំងដែលធ្លាយពីរថយន្តដឹកប្រេងសាំងដែលសម្លាប់មនុស្សជាង៥០នាក់នៅប្រទេសហៃទីកាលពីឆ្នាំ២០២១កន្លងមក៕
